„Þetta verður fallegur dagur í fjallinu“

Andri Teitsson, Skíðafélagi Akureyrar, hóf í morgun atlögu að óformlegu Íslandsmeti í skíðagöngu; hann veit um þrjá Íslendinga sem gengið hafa 203 kílómetra í einni lotu og ætlar að gera betur en þeir. Andri hófst handa við gönguskálann í Hlíðarfjalli kl. 11.00 og reiknar með að ganga linnulaust um svæðið þar til fljótlega eftir hádegi á morgun, föstudaginn langa.

Hann hlakkar til áskorunarinnar. „Þetta verður fallegur dagur í fjallinu,“ sagði Andri sæll og glaður þegar Akureyri.net hitti hann að máli örskotsstund í Hlíðarfjalli fyrir hádegi. Þoka lá yfir höfuðstað Norðurlands í morgun en sólin skein hins vegar á skíðasvæðið þegar Andri renndi sér af stað ásamt eiginkonu sinni og börnum, sem gengu með honum fyrsta spölinn. Fljótlega laumaði þokan sér reyndar inn á göngusvæðið, hefur líklega bara villst af leið enda staldraði hún stutt við og er ekki saknað. Fjöldi fólks var í Hlíðarfjalli í morgun, bæði í brekkunum og á göngusvæðinu. Sólin og lognið ráða nú ríkjum þar líkt og annars staðar við Eyjafjörð.

• Frétt Akureyri.net í morgun: Hyggst ganga rúma 200 km á skíðum í einni lotu