Margra grasa kennir á Jólatorginu

Jólatorgið á Ráðhústorgi er opið um helgina og þar kennir margra grasa. Í skreyttum jólahúsum verður til sölu ýmis varningur sem minnir á  hátíðina framundan, hvolpasveitin mætir í jólaskapi til að skemmta yngstu gestunum og jólasveinar verða einnig á ferðinni. Tónlistarfólkið Jónína Björt og Valmar Väljaots, sem og Barnakór Akureyrarkirkju, flytja jólalög.

Meðal annarra verða á torginu í dag og á morgun þessir sjálfboðaliðar  á vegum Rauða krossins að selja Velferðarstjörnuna til styrktar Velferðarsjóðs Eyjafjarðarsvæðis. Jólatorgið er opið til kl. 17.00 í dag og aftur kl. 13.00 til 17.00 á morgun.

„Þetta er fjölþjóðlegur hópur sjálfboðaliða á vegum Rauða krossins að selja Velferðarstjörnuna auk auk þess sem sjálfboðaliðar úr prjónahópnum selja prjónavörur og Sigurður H. Ringsted er hér að selja dagatöl sem hann hannaði sjálfur til styrktar mannúðarstarfs,“ segir Róbert Theodórsson, verkefnastjóri hjá Rauða krossinum við Eyjafjörð, við Akureyri.net á torginu eftir hádegi, og bætir við: „Frír kakóbolli með hverri seldri stjörnu!“

Á myndinni eru, frá vinstri: Noelia, Laura, Sigurður, Sergii, Osama, Ragnhildur, Bryndís Alena og Róbert.