Kristján sjötugur - tertur í öllum skipum
Kristján Vilhelmsson, framkvæmdastjóri útgerðarsviðs Samherja og einn af stofnendum fyrirtækisins, er sjötugur í dag. Af því tilefni gæddu áhafnir allra skipa Samherja sér á dýrindis afmælistertum. Frá þessu er sagt á vef Samherja.
Frétt Samherja er stutt og laggóð með tertumyndum úr nokkrum skipum fyrirtækisins.
„Kokkar skipanna skreyttu afmælisterturnar með sínum hætti, afmælisbarninu til heiðurs og skipstjórar sendu honum afmæliskveðjur frá áhöfnum. Sömu sögu er að segja um ýmsar starfsstöðvar Samherja, þar var haldið upp á tímamótin,“ segir í frétt fyrirtækisins.
Svona var tertan um borð í Vilhelm Þorsteinssyni EA 11, en það skip heitir eftir föður Kristjáns. Mynd: Samherji.
Kristján er þar meðal annars nefndur sem frumkvöðull og leiðandi í þróunarverkefnum. „Togarafloti Samherja hefur í áranna rás verið í stöðugri þróun, þar sem áhersla er lögð á náið samstarf Samherja og framleiðendur búnaðar. Í mörgum tilvikum er um að ræða sérhæfðar lausnir sem byggja á nýsköpun og frumkvöðlastarfi, sem við Íslendingar getum verið stoltir af. Kristján hefur stuðlað að og verið leiðandi í slíkum þróunarverkefnum.
Þá sendir samverkamaður Kristjáns og frændi, Þorsteinn Már Baldvinsson, forstjóri Samherja, honum kveðjur og samgleðst honum á þessum tímamótum. „Kristján er traustur, framsýnn og frjór í hugsun. Samstarf okkar hefur verið afar farsælt í gegn um tíðina, bæði þegar vel hefur árað og þegar blásið hefur á móti. Það er ekki sjálfgefið að eiga slíka sögu,“ segir Þorsteinn Már Baldvinsson.
