Freyja Rún tendraði ljósin á jólatrénu

Akureyringar fjölmenntu á Ráðhústorg síðdegis í ljómandi góðu veðri þegar ljósin voru tendruð á jólatré bæjarbúa. Það var tveggja ára stúlka, Freyja Rún Yannicksdóttir Hoeing, sem sá um að ýta á takkann að þessu sinni. 

 

Tréð á torginu var í áratugi gjöf frá Randers, vinabæ Akureyrar í Danmörku, en á aðventunni í fyrra var ákveðið að hætta að flytja tré að utan til þess að minnka kolefnissporið og þess í stað er valið tré úr bæjarlandi Akureyrar. Það er reisulegt og fallegt að þessu sinni, eins og venjan er.

 

 

Samkoman hófst með því að Lúðrasveit Akureyrar lék nokkur jólalög undir stjórn Sóleyjar Bjarkar Einarsdóttur. Jólasveinar stigu síðan á svið, léku við hvern sinn fingur og voru svo elskulegir að hleypa bæði Geir Kristni Aðalsteinssyni, nýjum ræðismanni Danmerkur á Norðurlandi, og Ásthildi Sturludóttur, bæjarstjóra á Akureyri, á svið og í míkrófón. Geir flutti Akureyringum góða kveðju frá borgarstjóra Randers og Ásthildur flutti stutta jólahugvekju.

 

Að því loknu komu mæðgurnar Freyja Rún og Guðrún Friðriksdóttir á svið, fjölskyldufaðirinn, Daninn Yannick Hoeing, var ekki langt undan og Ásthildur bæjarstjóri hjálpaði jólasveinunum að telja niður þar til Freyja Rún fékk að ýta á takkann og tendra þannig ljósin.

 

Því næst söng Barnakór Akureyrarkirkju undir stjórn Sigrúnar Mögnu Þórsteinsdóttir áður en jólasveinarnir trölluðu klassísk jólalög með gestum á Ráðhústorgi og viðburðinum lauk með því að sveinarnir vinsælu sátu fyrir á myndum með fjölda barna og buðu viðstöddum að þiggja hollt jólagóðgæti úr pokum sínum.