Fjölskyldan stór vinningur og „lífslokameðferð“ á verkstæðinu

Óskar Pétursson fagnaði sjötugsafmæli sínu á jóladag. Þá birtist fyrsti hluti viðtals Akureyri.net við þennan lífsglaða söngvara og bifvélavirkja úr Skagafirði. Í dag er botninn sleginn í spjall Rakelar Hinriksdóttur við afmælisbarnið, með fjórðu greininni.

• JÓLADAGUR – Óskar 70 ára: Röddin að skána ef eitthvað er!
• ANNAR Í JÓLUM – Fékk kennslu á lífið frá afleitum fyrirmyndum – eldri bræðrunum!
• Í GÆR – Ekkert merkilegra að vera söngvari en eitthvað annað

Á bílaverkstæði Óskars við Óseyri er hann stundum einn að bardúsa, en þó lang oftast með einhverja karla með sér. „Ég segi alltaf að ég sé með nokkra í svona lífslokameðferð,“ segir Óskar og glottir. „Þeir eru hættir að vinna og koma hingað til þess að stytta sér stundir.“ Þegar blaðamaður Akureyri.net heimsækir verkstæðið eru tveir herramenn á svæðinu ásamt Óskari, þeir Hólmar og Benni.

Óskar á góða vini hér og þar, og einn þeirra hefur tengingar við súkkulaðigerð. Þess vegna hefur verkstæðinu áskotnast ágætis lager af úreltum páskaeggjum og það er veisla á kaffistofunni. Umræðurnar eru líflegar og þetta er ábyggilega með þeim skemmtilegri lífslokameðferðum sem eru í boði á svæðinu.

„Ég er ekki neinn vélasérfræðingur, alls ekki,“ leiðréttir Óskar þegar blaðamaður heldur að hann sé vélahvíslari. „Þetta snýst eiginlega mest um að gera upp gamla bíla. Gera þá glæsilega!“ Óskar segist eiga talsvert umfram ráðlegan skammt af gömlum bílum og eins og áður kom fram, þá er hann líka með bílnúmerablæti. „Ég á A1, A22, A25, A44, svo fátt eitt sé nefnt.“ Núna er Óskar að gera upp ansi krúttlega Volkswagen bjöllu, sem hann fullyrðir að verði alveg eins og ný þegar hann hafi lokið sér af. Hann er svolítið eins og kátur krakki á jólunum þegar hann sýnir blaðamanni bjölluna. Talandi um jól, þá var sjötugsafmæli Óskars einmitt á jóladag eins og áður er getið.

Er eitthvað vesen að eiga afmæli á jóladag?

„Nei nei, ég þekki svosem ekki neitt annað,“ segir Óskar léttur í bragði. „En það er auðvitað oft eitthvað sem truflar afmælisdaginn. Nóg er nú samt af fólki í kring um mig. En það er þá kannski frekar út af jólaboðum.“ Óskar viðurkennir að hann hafi síðastliðin ár farið að nöldra smávegis yfir því að enginn muni eftir afmælinu sínu vegna þess að alltaf sé verið að skipuleggja jólaboð. „Það endaði með því að það fóru að streyma til mín pakkar í jólaboðum, eitthvað hafði þetta kvisast út. Þá sá ég eiginlega svolítið eftir því að hafa verið að nöldra þetta. Ég skaut mig eiginlega í fótinn vegna þess að það kom á daginn að mér leiddist athyglin!“

Það eru fleiri stórhátíðarbörn í Álftagerðisfjölskyldunni. Elsti bróðir Óskars var fæddur á nýársdag og næst elsti bróðirinn var fæddur á föstudaginn langa. „Hann var fæddur 23. apríl og daginn hefur borið upp á allskonar hátíðir. Sumardaginn fyrsta, föstudaginn langa og páskadag, sem dæmi. Þetta er spennandi dagsetning.“

„Ég treysti því nú reyndar að fólk verði í einhverjum jólaboðum á afmælisdaginn svo ég fái einhvern frið.“

„Ég er náttúrlega búinn að halda afmælistónleikana mína, sem voru eiginlega aðal partíið,“ sagði Óskar fyrir jól, spurður um hvað hann ætlaði að gera til hátíðarbrigða á afmælinu í ár. „Svo ætla ég bara að reyna að vera góður gæi um jólin. Njóta þess að vera til.“ Hann sagðist ekki ætla að halda neina veislu en þeir sem kæmu í heimsókn fengju náttúrlega kaffi.

„Ég treysti því nú reyndar að fólk verði í einhverjum jólaboðum á afmælisdaginn svo ég fái einhvern frið,“ sagði Óskar þegar blaðamaður ræddi við hann fyrir jól, og staðfestir núna að hann hafi að mestu fengið frið!

Óskar hélt upp á daginn í faðmi fjölskyldunnar, en þau hjónin eiga þrjú börn og fjögur barnabörn.„Yngsti sonur minn á hund, þannig að það er ekkert síður. Ekki má gleyma honum!“ segir Óskar. „Þetta lið er allt í þokkalegu lagi, þannig að ég get ekki verið annað en þakklátur og glaður á þessum tímamótum,“ segir afmælisbarnið og bætir við: „Ég er þokkalega brattur!“

Vann í fjölskylduhappdrættinu

Óskar var spurður í öðrum hluta viðtalsins hvað væri eftirminnilegast þegar horft væri til baka á tímamótunum og svaraði þá: „Það var náttúrlega rosalega sérstakt að eignast þessa krakkaorma.  Vera allt í einu kominn með einhverjar eftirprentanir. Það var stórfurðulegt. Mér fannst það vera töluvert álag, þó að það bitnaði náttúrlega minnst á mér.“

Elsta barn Óskars og Jónínu eiginkonu hans er Erla Malen sem býr í Danmörku og starfar sem sérkennari. Maður hennar er Mads Yde og þau eiga synina Óskar Nóa og Ísak Mána.

Miðjubarnið er sonurinn Björn Elvar, slökkviliðs- og sjúkraflutningamaður á Akureyri. Kona hans er Þórdís Gísladóttir og þau eiga tvær dætur, Rakel Heiðu og Aldísi Evu.

Yngsta barn Óskars og Jónínu er sonurinn Þorsteinn Máni. Hann er sjúkraþjálfari og býr í „borg óttans“ eins og Óskar orðar það og á við höfuðborg lýðveldisins. Kona Þorsteins Mána er Tinna Dögg Sigurðardóttir.

Óskar er afskaplega ánægður og stoltur af fjölskyldu sinni og fer ekki leynt með það, enda engin ástæða til: „Ég vann stóra vinninginn í fjölskylduhappdrættinu. Það er heilagur sannleikur,“ segir hann. „Ég hefði ekki getað orðið heppnari, hvorki með eiginkonu né börn. “