Þórssigur í alvöru spennutrylli

Þórsstelpurnar höfðu betur, 80:78, í fyrsta leiknum gegn Snæfelli í undanúrslitum 1. deildarinnar í körfubolta í Íþróttahöllinni á Akureyri síðdegis. Eftir að gestirnir höfðu verið yfir síðan í fyrsta leikhluta tóku Þórsarar frábæran sprett í þeim fjórða og síðasta. Þrjá sigra þarf til að komast í úrslitarimmu um eitt laust sæti í efstu deild.

• Skorið eftir leikhlutum: 13:16 – 18:18 (31:34) – 22:26 – 27:18 – 80:78

Tuba Poyraz tryggði Þórsliðinu sigur með þriggja stiga skoti þegar sjö sekúndur voru eftir af leiknum. Lokaspretturinn var æsispennandi:

Ein og hálf mínúta var eftir þegar Þórsarar komust yfir í fyrsta skipti síðan í fyrsta leikhluta; Hrefna Ottósdóttir skoraði þá með glæsilegu þriggja stiga skoti úr horninu – kom Þór í 74:73.

Gestirnir komust einu stigi yfir á ný er Minea Ann-Kristin Takala hitti úr þremur vítaskotum, þegar 44 sekúndur voru eftir.

Hrefna hikaði hvergi í næstu sókn Þórs og setti niður annað þriggja stiga skot þegar 32 sekúndur voru eftir.

Spennan hélt áfram. Gestirnir komust yfir 78:77 þegar 22 sekúndur voru eftir.

Þegar sjö sekúndur lifðu leiks fetaði Tuba Poyraz í fótspor Hrefnu; fékk boltann í horninu, spennan var áþreifanleg í húsinu og margir á nálum á áhorfendabekkjunum, eins og sjá má á efstu myndinni! Tuba, sem hafði sig lítið í frammi í leiknum og hafði mistekist eina þriggja stiga skotið til þessa, brást ekki á ögurstundu og skoraði örugglega! Reyndust það síðustu stigin því gestunum brást bogalistin í síðasta skoti leiksins.

Hrefna Ottósdóttir var frábær í sókninni og gerði 25 stig, Madison Anne Sutton 24 og Heiða Hlín Björnsdóttir 16.

Smellið hér til að sjá alla tölfræðina