Þórsarar áfram í bikarkeppninni

Þórsarar eru komnir í 16-liða úrslit Mjólkurbikarkeppninnar í knattspyrnu eftir 2:1 sigur á Grindavík á Þórsvellinum (Salt Pay vellinum) í kvöld. Alvaro Montejo  kvaddi heimavöllinn með viðeigandi hætti; þessi mikli markaskorari gerði sigurmarkið í síðasta heimaleiknum með Þórsliðinu. Hann heldur til Spánar eftir útileik gegn Fjölni í deildinni um næstu helgi.

Alvaro kom inn á sem varamaður á 56. mínútu og skoraði aðeins tveimur mínútum síðar. Kom Þór í 2:0 eftir að Maciej Majewski varði skot Sölva Sverrissonar og boltinn hrökk út í teig til Alvaros. Það var Jakob Snær Árnason sem gerði fyrra markið strax á fimmtu mínútu eftir flottan undirbúning Ásgeirs Marinós Baldvinssonar.

Mirza Hasecic minnkaði muninn fyrir gestina á 77. mínútu, þeir sóttu af krafti undir lokin en Þórsarar vörðust vel og fögnuðu sæti í næstu umferð.

Sigurinn var kærkominn eftir heldur brösugt gengi Þórsara í deildinni undanfarið. Vonandi blæs hann þeim von í brjóst.

Orri Hjaltalín, þjálfari Þórs, gerði fimm breytingar á liðinu frá síðasta deildarleik, 1:0 tapi fyrir Kórdrengjum á heimavelli á föstudaginn á Íslandsmótinu. Auðunn Ingi Valtýsson stóð í markinu og þeir Birgir Ómar Hlynsson, Jakob Snær Árnason, Ásgeir Marinó Baldvinsson og Sölvi Sverrisson komu líka inn í liðið.

• Auðunn Ingi Valtýsson markvörður er aðeins 18 ára. Þetta var fyrsti heili „alvöru“ leikur hans með meistaraflokki Þórs.
• Auðunn Ingi tók þátt í einum leik á Íslandsmótinu í fyrrasumar, kom þá inn á eftir 27 mínútur þegar Aron Birkir Stefánsson fór meiddur af velli í 3:2 sigurleik gegn Leikni frá Fáskrúðsfirði í Fjarðarbyggðahöllinni. Auðunn hefur staðið í marki Þórs í deildarbikarkeppninni og öðrum vetrarmótum, en aðeins þessum tveimur „alvöru“ leikjum sem nefndir voru.

Smelltu hér til að sjá leikskýrsluna.