Fengu bronsverðlaun í Atskákkeppni taflfélaga

Stórmeistarinn Jóhann Hjartarson sem gekk nýverið í Skákfélag Akureyrar tefldi nú í fyrsta sinn með félaginu eftir að hann snéri aftur en Jóhann var í félaginu um nokkurra ára skeið fyrir margt löngu. Endurkoma Jóhanns fór vel í liðsmenn sem tefldu af miklum krafti og náðu að lokum bronsinu, voru sjónarmun á undan skáksveit Breiðabliks. Taflfélag Reykjavíkur vann öruggan sigur og Fjölnismenn urðu í 2. sæti.

 

Fyrir Skákfélag Akureyrar tefldu á mótinu Jóhann Hjartarson, Björn Ívar Karlsson, Símon Þórhallsson, Mikael Jóhann Karlsson, Stefán Bergsson, Halldór Brynjar Halldórsson, Arnar Þorsteinsson og Markús Orri Óskarsson.

 

 

Helgina áður nældi Markús Orri sér í brons á Íslandsmóti ungmenna; varð í 3. sæti í flokki 16 ára og yngri. Fleiri fengu brons á því móti: Sigþór Árni Sigurgeirsson í flokki 14 ára og yngri og Nökkvi Már Valsson í flokki 10 ára og yngri. Þá gerði Harpa Hrafney Karlsdóttir sér lítið fyrir og  varð í 2. sæti og fékk því silfur í stúlknaflokki 12 ára og yngri.

 

Vert er að geta þess að Sigþór, Harpa og Nökkvi eru öll á yngra ári í sínum aldursflokki. Alls tóku átta keppendur frá Skákfélagi Akureyrar þátt á Íslandmótinu.

 

 

Áskell Örn Kárason, formaður Skákfélags Akureyrar og alþjóðlegur skákmeistari, tefldi nýlega á Evrópumóti 65 ára og eldri sem fram fór á Ítalíu. Tæplega 100 keppendur voru skráðir til leiks og var Áskell sá 38. stigahæsti. Hann fór vel af stað, hélt sínu striki allt mótið og endaði í 15. sæti með fimm og hálfan vinning í níu umferðum. Áskell hækkar um 35 stig fyrir árangurinn sem þykur nokkuð drjúgur fengur fyrir aðeins eitt mót og undirstrikar góðan árangur hans á mótinu.