Sannfærandi sigur Þórs/KA á Þrótturum

Þór/KA vann mjög sanngjarnan 2:0 sigur á Þrótti í Reykjavík í dag, í efri hluta Bestu deildarinnar kvenna í knattspyrnu. 

Stelpurnar okkar voru mun betri í leiknum. Þær sóttu af miklum móð í fyrri hálfleik, fengu góð færi til að skora en tókst ekki, en aðeins voru liðnar þrjár mínútur af þeim síðari þegar Sandra María Jessen braut ísinn. Karen María Sigurgeirsdóttir átti frábæra sendingu inn fyrir vörn Þróttar og Sandra María skoraði með föstu skoti utarlega úr vítateignum.

Það var svo Jakobína Hjörvarsdóttir sem gerði seinna markið á 70. mínútu. Hún tók aukaspyrnu langt úti á velli, boltinn skoppaðí í vítateignum og sigldi í gegnum hóp leikmanna og í markið án þess að nokkur snerti hann.

Valur er þegar orðinn Íslandsmeistari eins og áður hefur komið fram. Breiðablik vann Stjörnuna 2:0 í dag er komið í annað sæti með 37 stig. Stjarnan hefur 35 stig, Þróttur 34 og Þór/KA 32. Annað sæti veitir keppnisrétt í Evrópukeppni.

Smellið hér til að sjá leikskýrsluna