Rafael Victor, Einar Freyr og Birkir valdir

Framherjinn Rafael Victor var valinn leikmaður ársins hjá Þór, Einar Freyr Halldórsson sá efnilegasti og Birkir Heimisson var valinn leikmaður leikmannanna. Þetta var tilkynnt á lokahófi knattspyrnudeildar um síðustu helgi.

Rafael var markahæsti Þórsarinn í sumar, gerði níu mörk í Lengjudeildinni. Einar Freyr er einn margra bráðefnilegra leikmanna Þórs; hann tók þátt í sex leikjum í deildinni, 15 ára gamall, fagnaði ekki 16 ára afmæli fyrr en tveimur dögum eftir síðasta deildarleikinn. Birkir Heimisson, sem kom til uppeldisfélagsins á ný fyrir tímabilið, var einn burðarása Þórs í sumar.