KA náði í „gott“ stig í miklum mótvindi
KA náði í eitt stig á KR-vellinum í dag þegar liðið gerði markalaust jafntefli við Reykjavíkurliðið í Bestu deild Íslandsmótsins í knattspyrnu.
Öll stig eru að sjálfsögðu góð, en það sem bættist í safnið í dag var sérlega gott því KA-menn lentu í miklum mótbyr. Ekki var liðinn nema rúmur hálftími af leiknum þegar úkraínski varnarmaðurinn Oleksiy Bykov var rekinn af velli fyrir að skalla framherjann Kjartan Henry Finnbogason, framherja KR, eftir að boltinn var farinn aftur fyrir endamörk.
Snemma í seinni hálfleik fékk svo Arnar Grétarsson, þjálfari KA, líka rautt spjald vegna munnsöfnuðar sem þótti ekki viðeigandi og varð að víkja af vettvangi.
KA-menn gengu að sjálfsögðu mun ánægðari af velli en heimamenn. KA hefur 10 stig eftir fjóra leiki, sem er afbragðs byrjun, en KR er hins vegar aðeins með fjögur stig eftir jafn marga leiki.
Smellið hér til að sjá leikskýrsluna
