Höllin í kvöld: Þór getur komist upp í efstu deild

Þórsarar fá Fjölnismenn í heimsókn í Íþróttahöllina í kvöld í úrslitaeinvíginu um sæti í efstu deild í handbolta. Þór hefur unnið tvo leiki en Fjölnir einn og sigri Þórsstrákarnir í kvöld leika þeir í Olís deildinni næsta vetur. Leikurinn hefst klukkan 18.30.

Fjölnir vann fyrsta leikinn 30:26 eftir framlengingu á heimavelli, Þór vann síðan 25:20 í Höllinni á Akureyri og aftur á heimavelli Fjölnis í Reykjavík á föstudagskvöldið, 29:27.

Mjög góð stemning hefur verið á heimaleikjum Þórs undanfarið en hún var ekki síðri í Egilshöllinni í Grafarvogi á  föstudag; stuðningsmenn Þórs fjölmenntu og létu vel í sér heyra.

Gera má ráð fyrir hörkuleik tveggja góðra liða í Höllinni í kvöld og ekki síður fjöri á áhorfendapöllunum. Vonandi flykkjast akureyrskir handboltaáhugamenn í Höllina og styðja Þórsara til sigurs.

Þórsarar auglýsa: Kvöldmatnum reddað – því hamborgarar verða grillaðir og seldir ásamt drykkjum.