Galdrakarlinn í OZ hjá LMA á föstudaginn í Hofi
Leikfélag Menntaskólans á Akureyri, LMA, mun frumsýna Galdrakarlinn í Oz á föstudaginn kemur kl. 20.00 í Hofi. Söguna þekkjum við flest, en söngleikurinn er byggður á barnabók eftir L. Frank Baum sem kom út um aldamótin 1900. Síðan þá hefur sagan af Dórotheu, sem feykist til töfralandsins Oz, birst okkur í bókum, á sviði og á hvíta tjaldinu. Nú eru það menntskælingar sem ætla að fylgja Dórotheu á sviði Hamraborgar í Hofi.
Í ár koma hátt í 90 nemendur skólans að uppsetningu verksins, og það er Egill Andrason sem leikstýrir. Í viðtali við Akureyri.net fyrr á árinu sagði hann; „Það sem mig langar að leggja upp með, er að þetta sé skemmtileg sýning. Ég vil hafa hraða atburðarrás, hafa tónlistina frábæra, að fólk syngi vel, dansi vel og að leikgleðin skíni. Að krakkarnir skíni.“
Mynd frá æfingu. Von er á því mikilli tónlist, dansi og söng. Mynd: aðsend
Dóróthea vill ekkert heitar en að komast aftur heim. Hún freistar þess að leita hjálpar hjá Galdrakarlinum í Oz, en á leiðinni til hans hittir hún heilalausu Fuglahræðuna, hjartalausa Tinkarlinn og huglausa Ljónið. Það eru því fleiri sem þurfa á hjálp að halda og saman halda vinirnir í mikla ævintýraferð. Sýningin er fyndin og hjartnæm og sannkölluð veisla fyrir allan aldur, segir í tilkynningu LMA um sýninguna. Varað er við að yngstu leikhúsgestirnir gætu orðið skelfdir.
Aðeins 6 sýningar eru í boði, en miðasala er á heimasíðu Menningarfélagsins.
Leikarar sýningarinnar heilsuðu unga fólkinu á Glerártorgi á öskudaginn, þegar blaðamaður Akureyri.net náði af þeim mynd. Mynd: RH
