Vinna við gagnaver gengur vonum framar

Fram­kvæmd­ir við bygg­ingu gagna­vers fyrirtækisins atN­orth við Hlíðarvelli á Akureyri ganga von­um fram­ar sam­kvæmt til­kynn­ingu frá fyrirtækinu. Vinna hófst um miðjan júlí, í vikunni voru síðustu þaksperrurnar í fyrstu byggingu gagnaversins reistar og af því tilefni var í gær efnt til reisugillis fyrir helstu samstarfsaðila, verktaka og starfsfólk þeirra.

Gagnaverið er steinsnar sunnan við höfuðstöðvar Norðurorku við Rangárvelli, handan Hlíðarfjallsvegar. Fyrsti áfangi er um 2.500 fer­metr­ar í tveim­ur sam­tengd­um bygg­ing­um, en full­byggt verður gagna­verið í fimm bygg­ing­um. Að auki er gert ráð fyr­ir þrem­ur skrif­stofu- og þjón­ustu­hús­um á lóð atN­orth. Stefnt er að því að hefja starfsemi fyrir mitt næsta ár.

Góður vitnisburður

„Gagna­verið er það fyrsta sinn­ar gerðar á svæðinu og mun nýt­ast viðskipta­vin­um atN­orth á marg­vís­leg­an hátt – sér­stak­lega þeim sem vilja tryggja land­fræðileg­ann aðskilnað gagna sem eru þegar hýst í öðrum gagna­ver­um,“ seg­ir í til­kynn­ing­unni.

Í reisugillinu þakkaði Eyjólfur Magnús Kristinsson, forstjóri atNorth, verktökum fyrir frábært starf og bæjaryfirvöldum fyrir skýra sýn við uppbygginguna að Hlíðarvöllum. „Framkvæmdir hafa gengið ótrúlega vel og maður trúir því varla, að í dag séu rétt um fjórir mánuðir frá samþykkt deiliskipulags fyrir svæðið. Sú staðreynd er góður vitnisburður um ykkur og gerir Akureyri að frábærum kosti fyrir þá sem vilja ráðast í uppbyggingu af hvaða tagi sem er,“ sagði Eyjólfur Magnús. Hann rifjaði upp forsendur þess að gagnaverinu var fundinn staður á Akureyri, en framboð á margvíslegri tækni- og rekstrarþjónustu var einn lykilþátta við staðarvalið auk tryggs framboðs og flutnings á raforku, með tilkomu Hólasandslínu, að sögn forstjórans.

Frekari verðmætasköpun

Vaktin er at­hygli á því í tilkynningu fyrirtækisins að allt timb­ur í burðar­virki kem­ur úr sjálf­bær­um skóg­um á Norður­lönd­um og stein­ull­in frá Stein­ull á Sauðar­króki kem­ur úr um­hverf­is­vottaðri fram­leiðslu. Mark­miðið sé að lág­marka kol­efn­is­spor fram­kvæmd­ar­inn­ar með inn­lend­um bygg­inga­lausn­um og ár­vekni gagn­vart um­hverf­inu.

Þá leiti atN­orth nú sam­starfsaðila til að nýta varma­mynd­un í gagna­ver­inu til frek­ari verðmæta­sköp­un­ar í græn­um iðnaði sem gæti minnkað kol­efn­is­fót­spor verk­efn­is­ins enn frek­ar.

Helstu verktakar við byggingu gagnaversins eru byggingafyrirtækin Perago Bygg og Lækjarsel, lagnafyrirtækið Áveitan, rafverktakinn Rafeyri og jarðvinnuverktakinn Finnur ehf. Hönnun hefur verið í höndum AVH, Raftákns, Verkíss á Akureyri og Elhönnunar.

• Frétt Akureyri.net 5. apríl – Gagnaver atNorth rís á Akureyri