Umfangsmikil æfing slökkviliðsins

Slökkvilið Akureyrar hóf í dag þátttöku í eldvarnaátaki Landssambands slökkviliðs- og sjúkraflutningamanna með rýmingar- og björgunaræfingu í rannsóknarhúsinu Borgum og aðalbyggingu Háskólans á Akureyri. Um er að ræða umfangsmestu rýmingaræfingu sem Slökkvilið Akureyrar hefur ráðist í.

Fjöldi starfsmanna og nemenda rýmdu byggingarnar og söfnuðust saman á fyrirfram ákveðnum svæðum. Notaður var búnaður sem slökkviliðið fékk frá Vegagerðinni til æfinga í jarðgöngum, tendraður var gervieldur og rými fyllt með sviðsreyk. Þá var björgun fólks úr byggingunum æfð, hápunkturinn var án efa „björgun“ Eyjólfs Guðmundssonar, rektors háskólans, út um glugga skristofu hans á 4. hæð rannsóknarhússins Borga.