Þórsarar unnu 800 þúsund í getraunum

Hamarinn, húskerfi Þórsara, náði 13 réttum á blönduðum getraunaseðli með landsleikjum og leikjum í neðri deildum á Englandi á laugardaginn. Fengu Þórsarar tæplega 800 þúsund krónur fyrir sinn snúð. Greint er frá þessu á heimasíðu félagsins í morgun.

Þar er nefnt að þetta var eina röðin sem náði 13 réttum á Íslandi á laugardagsseðlinum, „en samtals voru 84 seðlar með 13 rétta, 83 í Svíþjóð og einn í Þorpinu,“ segir þar.

„Það stefndi reyndar lengi vel í að húskerfið fengi aðeins 12 rétta. Tíu leikjum var lokið á seðlinum og þrír landsleikir í gangi, Spánn-Noregur, Króatía-Wales og Andorra-Rúmenía. Treyst var á sigur Spánverja og Rúmena og fljótlega ljóst að það gengi eftir,“ segir á Þórsvefnum.

„Í kerfinu var hins vegar gert ráð fyrir að Wales myndi mögulega ná jafntefli við Króatíu, eða að Krótatar myndu sigra, sem sagt gert ráð fyrir 1x á þeim leik. Króatar komust yfir og allt leit út fyrir sigur þeirra þar til í uppbótartíma þegar Nathan Broadhead, leikmaður Ipswich Town sem spilar í þriðju efstu deild á Englandi (League One), skoraði jöfnunarmark á þriðju mínútu viðbótartíma leiksins.“

Smellið hér til að lesa meira á heimasíðu Þórs.