Stækka gagnaverin og heimta glatvarma

Stækkun tveggja gagnavera atNorth á Íslandi er hafin, bæði í Reykjanesbæ og á Akureyri. Heildarfjárfesting fyrirtækisins vegna stækkunarinnar er 41,2 milljarðar króna, að því er segir í tilkynningu „en við bætist fjárfesting viðskiptavina fyrirtækisins í tölvubúnaði sem nemur nálægt 300 milljörðum króna.“

Fyrirtækið hefur einnig tilkynnt að það hafi gengið til samstarfs við Hringvarma um heimt glatvarma frá gagnaverunum til að nota í matvælaframleiðslu. Hringvarmi kemur til með að setja upp frumgerð búnaðar síns gagnaveri atNorth á Akureyri og nota hitann frá gagnaverinu til að rækta grænspírur (e. microgreens) í samstarfi við Rækta Microfarm.

„Okkur er mikil ánægja að vera með í vistkerfi hátæknigagnavera atNorth. Markmið samstarfsins er að efla íslenskan landbúnað og draga úr þörf fyrir innfluttar vörur um leið og við leggjum lóð á vogarskál hringrásarhagkerfisins á Íslandi,“ er haft eftir Justine Vanhalst, meðstofnanda Hringvarma, í tilkynningu atNorth.

Aukin eftirspurn

„Með stækkun gagnaveranna mætum við aukinni eftirspurn eftir þjónustu atNorth bæði frá erlendum og innlendum viðskiptavinum, en stækkunin er í samræmi við sjálfbæra vaxtarstefnu atNorth og byggir á fyrirliggjandi byggingarleyfum og samningum um orkukaup,“ segir Eyjólfur Magnús Kristinsson, forstjóri atNorth. „Á Akureyri og í Reykjanesbæ er til staðar mikil þekking, mannauður og traust fyrirtæki sem geta veitt atNorth góða þjónustu við rekstur og viðhald á tæknibúnaði í gagnaverum fyrirtækisins.“

Í tilkynningu atNorth segir að um sé að ræða umfangsmestu stækkun sem íslenskt gagnaver hafi ráðist í „og innifelur umtalsvart magn af hátæknibúnaði. Leigja þurfti sérhæft flutningaskip til að flytja hluta búnaðarins og kallaður var til stærsti krani landsins til að hífa búnaðinn inn á lóð gagnaversins.“

Þar segir að hönnun gagnavera atNorth miði að þörfum fyrirtækja sem vinna með mikið magn gagna og þurfi aðgang að búnaði sem ræður við þunga tölvuvinnslu og útreikninga, „og nýtur þeirra kosta sem staðsetningin býður upp á, með aðgangi að hreinni orku og sjálfbærri nálgun atNorth.“

Auk gagnaveranna í ICE02 Reykjanesbæ og á ICE03 Akureyri rekur atNorth gagnaverið ICE01 í Hafnarfirði, en hjá fyrirtækinu starfa yfir 160 manns, fyrir utan verktaka.

Eins og er rekur atNorth sjö gagnaver í fjórum af fimm Norðurlöndunum. Þá eru fjögur ný gagnaver í byggingu, tvö í Finnlandi (FIN02 í Helsinki og FIN04 í Kouvola) og tvö í Danmörku (DEN01 í Ballerup og DEN02 í Ølgod í Varde).