Snýr heim og tekur við Hríseyjarbúðinni

Gabríel Ingimarsson hefur tekið við stöðu rekstrarstjóra Hríseyjarbúðarinnar og snýr aftur í heimabyggð eftir nokkurra ára fjarveru með viðkomu í Reykjavík, Laugum í Reykjadal og Brussel.

Gabríel er með BS gráðu í viðskiptafræði frá Háskóla Íslands með áherslu á fjármál og starfaði síðast sem sérfræðingur í fjármáladeild Össurar í þrjú ár. Sem rekstrarstjóri mun Gabríel leggja áherslu á að bæta rekstrargrundvöll verslunarinnar með auknum viðskiptum við eyjarskeggja og með breiðara vöruúrvali þannig að þar standi Hríseyingum allar helstu nauðsynjar til boða. „Sér hann fram á skemmtileg tækifæri í að að víkka út hlutverk búðarinnar í samfélaginu þannig hún sinni stærra samfélagslegu hlutverki á veturna,“ segir í tilkynningu.

Gabríel segist vera þakklátur fyrir þær móttökur sem hann hefur fengið á þeim stutta tíma síðan hann hóf störf og hlakkar til að vinna með og í þágu íbúa Hríseyjar á komandi tímum.

„Það er gríðarlega verðmætt að fá tækifæri að snúa aftur í Hrísey og taka við rekstri verslunarinnar. Það hefur verið mikill uppgangur í Hrísey og ég er ánægður að geta tekið þátt í og stuðlað að því, í litlu samfélagi munar um allt og ég er spenntur að leggja mitt lóð á vogarskálarnar,“ segir Gabríel nýr rekstrarstjóri Hríseyjarbúðarinnar.

Vill styrkja verslun í Hrísey

Hríseyjarbúðin var stofnuð árið 2015 af fólki í eyjunni og hugsuð sem samfélagslegt verkefni. Í dag eru hluthafar í búðinni 79 talsins. „Verslunin er opin allt árið og er þar einnig rekin afgreiðsla fyrir Póstinn, mannlegur hraðbanki, afhendingarstöð fyrir Vínbúðina og sjálfsafgreiðsluverslun utan opnunartíma,“ segir í tilkynningunni.

„Það eru mörg spennandi tækifæri í rekstri Hríseyjarbúðarinnar til að bæta þjónustu við íbúa jafnt sem sumarhúsaeigendur og ferðamenn. Rekstri sjálfstæðra verslana á landsbyggðum Íslands fylgja einstakar áskoranir en tækifærin eru alveg jafn einstök og huga þarf sérstaklega að því að auka og tryggja rekstrarstoðir Hríseyjarbúðarinnar til lengri tíma,“ bætir Gabríel við.