„Sniðganga“ verður í dag fyrir Palestínu

Sniðgengið verður bæði á Akureyri og á höfuðborgarsvæðinu i dag, laugardag, til stuðnings Palestínu. Þetta kemur fram í tilkynningu frá Sniðgönguhreyfingunni á Íslandi. Gengið verður af stað kl. 14.00 á báðum stöðum, á Akureyri verður safnast saman við útilistaverkið Íslandsklukkana á lóð háskólans. 

 

„Sniðgangan 2024 verður farin til að vekja athygli á sniðgöngu fyrir Palestínu og mikilvægi þess að sniðganga Ísrael og ísraelskar vörur þar til stjórnvöld í Ísrael lúta alþjóðalögum og virða frelsi og réttindi Palestínumanna,“ segir í tilkynningunni. „Sniðganga er áhrifamikil og friðsamleg leið til að sýna palestínsku þjóðinni samstöðu og taka afstöðu gagnvart þeim sem hagnast á landráni, hernámi og stríðsglæpum ísraelskra stjórnvalda.“

 

 

„Sniðgönguhreyfingin á Íslandi fer vaxandi dag frá degi. Í hreyfingunni er venjulegt fólk sem getur ekki horft aðgerðalaust á þjóðarmorðið í Palestínu og neitar að vera meðsekt í glæpum Ísraelsríkis. Sniðgönguhreyfingin á Íslandi – BDS Ísland leggur sérstaka áherslu á 7 vörumerki/fyrirtæki. Hægt er að afla sér upplýsinga um þau og um sniðgöngu almennt á vefsíðu sniðgönguhreyfingarinnar https://snidganga.is/“

 

Sniðgangan 2024 hefst á sama tíma á höfuðborgarsvæðinu og Akureyri kl. 14 í dag, laugardaginn 14. september. Á Akureyri verður safnst saman hjá Íslandsklukkunni sem fyrr segir en á höfuðborgarsvæðinu í Hellisgerði í Hafnarfirði. Gangan á Akureyri er 2,8 km en 10 km á höfuðborgarsvæðinu. „Lengd göngunnar á höfuðborgarsvæðinu er táknræn að því leyti að sniðganga er í eðli sínu langtímaverkefni. Göngufólki er í sjálfsvald sett hvort það gengur alla leið. Einnig getur fólk alfarið sleppt göngu og mætt til fundar við göngufólk að göngunum loknum.“

 

 

Báðum göngunum lýkur með samkomu og ræðuhöldum. Göngunni á Akureyri lýkur á Ráðhústorginu kl. 15:15 með erindi, tónlist og Dabkeh-dansi. Göngunni á höfuðborgarsvæðinu lýkur í Katrínartúni í Reykjavík um eða upp úr kl. 17 með erindi og tónlist.

 

„Öll sem styðja málstað Palestínu eru hvött til að ganga á laugardaginn, annað hvort á höfuðborgarsvæðinu eða Akureyri, en þau sem komast ekki þangað eru hvött til að ganga á sama tíma hvar sem þau kunna að vera stödd. Hægt er að nota myllumerkið #snidgangan til að merkja myndir og færslur sem tengjast viðburðinum á samfélagsmiðlum,“ segir í tilkynningunni frá Sniðgönguhreyfingunni.