Fara í efni
Fréttir

Rekstraröryggi verði óbreytt næstu 20 til 25 ár

Skapti Hallgrímsson - skapti@akureyri.net 04.05.2023 kl. 18:05
Reykjavíkurflugvöllur. Mynd af vef Isavia.
Bæjarráð Akureyrar telur mikilvægt að óbreytt rekstraröryggi Reykjavíkurflugvallar verði tryggt að minnsta kosti næstu 20 til 25 árin. Þetta kemur fram í bókun sem samþykkt var samhljóða á fundi ráðsins í morgun þar sem flugvöllurinn var til umræðu og ný skýrsla um áhrif byggðar og framkvæmda á flug- og rekstraröryggi flugvallarins.
 
Bæjarráð samþykkir samhljóða eftirfarandi bókun:
 

„Reykjavíkurflugvöllur er mikilvægur hlekkur í tryggum samgöngum fyrir landsbyggðina og mikilvæg tenging við höfuðborgarsvæðið. Það er bæði öryggis- og hagsmunamál að völlurinn geti áfram þjónað því fjölbreytta hlutverki sem honum er ætlað með tilliti til sjúkraflugs, aðgengi almennings að innviðum, atvinnulífs og uppbyggingu ferðaþjónustu á landsbyggðinni. Reykjavík er höfuðborg okkar allra en skipulagsvaldið yfir Skerjafirðinum er hennar. Þess vegna er mjög mikilvægt að tryggt verði með góðri samvinnu að mótvægisaðgerðum verði fylgt í hvívetna og að rekstraröryggi Reykjavíkurflugvallar í Vatnsmýri verði ekki stofnað í hættu. Mikilvægt er að samkomulag ríkis og borgar frá árinu 2019 um að tryggja rekstraröryggi á Reykjavíkurflugvelli a.m.k. næstu 20-25 árin haldist óbreytt.“

Til baka í fréttayfirlit