Rammgerð bankahólf eru barn síns tíma

Landsbankinn á Akureyri mun hætta að leigja út bankahólf þegar bankinn flytur starfsemi sína í nýtt húsnæði á næsta ári. Þjónustan er barn síns tíma, segir útibússtjórinn.

Í kjallara Landsbankans við Ráðhústorg er að finna rammlæst herbergi sem hefur að geyma 512 bankahólf sem viðskiptavinir bankans hafa getað tekið á leigu undir verðmæti. Elstu hólfin eru nærri 70 ára gömul og eru steypt inn í vegg hvelfingarinnar. Einnig eru þar nýrri hólf í stæðum. Mörg elstu hólfin eru nú þegar orðin ónothæf þar sem ekki er lengur hægt að kaupa varahluti í læsingar þeirra. 

„Það verður eftirsjá af þessu húsi enda hefur Landsbankinn verið hér við Ráðhústorgið síðan 1954. En húsið verður hérna áfram og við erum full tilhlökkunar að fara í nýtt húsnæði,“ segir Arnar Páll Guðmundsson, útibússtjóri Landsbankans á Akureyri. Samfara flutningnum verða ákveðnar breytingar m.a. munu bankahólfin ekki fylgja Landsbankanum yfir í nýtt húsnæði við Skipagötu og þjónustan leggst af við flutningana.

Geymslur fyrir verðmæti

„Menn voru að geyma í þessum hólfum verðmæti eins og peninga, verðbréf, hlutabréf og skuldabréf, en þetta er mikið komið á rafrænt form í dag. Þessi þjónusta er því barns síns tíma og fellur ekki lengur undir hefðbundna bankastarfsemi eins og hún er í dag,“ segir Arnar Páll spurður um ástæðuna fyrir því að Landsbankinn á Akureyri mun fljótlega hætta að bjóða upp á þessa þjónustu. Fleira hefur líka breyst á þeim tæplega 70 árum sem bankinn hefur verið í húsinu. Sjaldgæfara er að fólk hafi reiðufé á milli handanna nú til dags. Áður fyrr voru laun t.d. gjarnan greidd út í seðlum og þá fannst mörgum gott að hafa örugga geymslu undir peningana.

Hvelfingin sem bankahólfin eru staðsett í er vissulega myndræn. Viðskiptavinir fá ekki að fara þangað inn nema þeir séu með bankahólf leigu en árgjald er greitt eftir stærð hólfanna. Þá fær enginn að fara þangað niður nema í fylgd starfsmanns bankans sem þarf að opna tvær traustar hurðir inn í hvelfinguna. Á hverju bankahólfi er tvöfalt lásakerfi, bankinn geymir annan lykilinn en leigutaki hinn. Kvitta þarf skriflega fyrir komuna í þar til gerða spjaldskrá við skrifborð í miðju herberginu en skrifborðið var í eigu fyrrum alþingismanns og útibússtjóra Landsbankans á Akureyri, Jóns G. Sólnes.

Skartgripir, erfðaskrár og filmur

Þó Arnar segi að hólfin séu barn síns tíma þá hefur verið töluverð ásókn í að leigja þau, en heimsóknir í hólfin eru þó ekki tíðar. „Margir sem eru með hólf á leigu hér hafa ekki heimsótt þau í mörg ár,“ segir Arnar og bætir við að bankinn hafi engar upplýsingar um það hvað fólk geymi í hólfunum, enda þurfa leigutakar ekki að gera grein fyrir notkuninni þegar hólf er tekið á leigu. Stærð hólfanna takmarkar hins vegar notkun þeirra enda voru hólfin upphaflega hugsuð fyrir pappíra á borð við verðbréf. „Ég reikna með að einhverjir séu að geyma skartgripi í hólfunum, erfðaskrár eða önnur skjöl, peninga, ljósmyndafilmur, fjölskyldu gersemar og tölvugögn. Við vitum ekki hvað er í hólfunum og þurfa leigutakar því að tryggja innihald þeirra sérstaklega sjálfir en við hins vegar verjum hólfin með öryggiskerfum bankans.“

Aðrar geymslulausnir til

Þeim sem eru með hólf á leigu hjá Landsbankanum á Akureyri verður gert viðvart skriflega með góðum fyrirvara hvenær þarf að vera búið að tæma hólfin. Verði einhver hólf ótæmd þegar bankinn flytur úr húsinu verða þau opnuð í viðurvist sýslumanns og innihaldið sett í innsiglaðar umbúðir sem bankinn varðveitir í ákveðinn tíma. „Það eru enn til bankahólf í mörgum útibúum Landsbankans, t.d. á Húsavík, Ísafirði og Egilsstöðum, en við erum eini bankinn á Akureyri sem enn er að bjóða upp á svona geymsluhólf, aðrir bankar hér í bænum eru hættir eða eru að hætta að bjóða upp á þetta. Í Reykjavík eru öll bankahólf Landsbankans komin í útibú bankans í Breiðholti,“ segir Arnar.

Hann bendir þeim sem eiga eftir að sjá á eftir bankahólfunum á Akureyri á aðrar lausnir sem eru meira í takt við nútímann. „Tölvugögn er t.d. hægt að geyma í ýmsum ský lausnum og þá er t.d. hægt að kaupa eldtraust hólf í byggingavöruverslunum. Þessi hólf eru ekki orðin svo dýr í dag. Mörg heimili eru orðin vöktuð þar sem margir eru komnir með eftirlitsmyndavélar og þjófavarnarkerfi við heimili sín. Það var í rauninni upphaflega konsept bankanna að þú gætir geymt verðmæti undir eftirliti. En tímarnir eru breyttir og aðrar lausnir komnar sem leysa bankahólfin af.“