Opið fyrir tilnefningar vegna FKA-hátíðarinnar
Opnað hefur verið fyrir tilnefningar vegna viðurkenningarhátíðar Félags kvenna í atvinnulífinu 2025. Hátíðin er haldin árlega og hver sem er getur tilnefnt konur í einum flokki eða öllum, til og með 21. nóvember.
- SMELLIÐ HÉR TIL AÐ TILNEFNA
Sjö manna dómnefnd fer yfir allar tilnefningar og verða úrslit kynnt á viðurkenningarhátíð FKA á Grand Hótel í Reykjavík 29. janúar. „Dómnefnd mun meta og á endanum, velja konur sem hljóta FKA þakkarviðurkenningu, FKA viðurkenningu og FKA hvatningarviðurkenningu. Lögð er áhersla á að fá nöfn ólíkra kvenna á lista þar sem mikilvægt er að beina kastaranum að flottum fyrirmyndum og fjölbreyttum hópi kvenna af öllu landinu, með ólíkan bakgrunn og reynslu sem dómnefnd mun vinna með og á endanum velja þær konur sem verða heiðraðar,“ segir í tilkynningu frá FKA.
FKA viðurkenningin var fyrst veitt árið 1999 „og síðustu ár hefur framlína í íslensku atvinnulífi og nánir samstarfsfélagar og fjölskyldur viðurkenningarhafar fagna saman á stórglæsilegri hátíð sem beðið er eftir með mikilli eftirvæntingu.“
Á hátíðinni eru veittar viðurkenningar til þriggja kvenna sem hafa verið hvatning og fyrirmyndir:
- FKA viðurkenning er veitt fyrir vel unnin störf í þágu atvinnureksturs kvenna eða þeim sem er eða hefur verið konum í atvinnulífinu sérstök hvatning eða fyrirmynd.
- FKA hvatningarviðurkenning er veitt konu í atvinnulífinu fyrir athyglisvert frumkvæði eða nýjungar.
- FKA þakkarviðurkenning er veitt konu fyrir eftirtektarvert ævistarf sem stjórnanda í atvinnulífinu.
„Hvaða þrjár konur verða heiðraðar?“ er spurt í tilkynningunni. „Hafðu áhrif og sendu inn tilnefningu fyrir FKA viðurkenninguna, FKA þakkarviðurkenninguna og FKA hvatningarviðurkenninguna 2025.“