Ókeypis í sund og á skíði í vetrarfríinu

Akureyrarbær býður grunn- og framhaldsskólanemum á Akureyri í sund og á skíði í vetrarfríi grunnskólanna. Frá þessu er greint á vef sveitarfélagsins í morgun.

Þar segir að á fimmtudag og föstudag í þessari viku geti grunn- og framhaldsskólanemar farið í skíðalyfturnar og sundlaugar Akureyrar án endurgjalds.

„Grunnskólanemendur gefa upp kennitölu og nafn skóla í afgreiðslu og framhaldsskólanemar í VMA og MA framvísa nemendaskírteinum.  Athugið að krakkarnir þurfa að eiga rafrænt kort eða kaupa slíkt á 1.100 krónur í skíðalyfturnar. Kortin fást í afgreiðslu Hlíðarfjalls og á N1,“ segir á vef bæjarins.