Ný Miðgarðakirkja verður vígð í sumar

Það var blíðskaparveður þegar Ásthildur Sturludóttir, bæjarstjóri Akureyrarbæjar heimsótti Grímsey ásamt starfsfólki sveitarfélagsins á þriðjudaginn var. Í frétt um heimsóknina á vefsíðu bæjarins segir að tilgangurinn hafi verið að eiga samtal við íbúa eyjunnar og fara yfir málefni sem snúa að aðkomu sveitarfélagsins.

Kirkjan vígð í sumar og nýr göngustígur

Það verða að teljast góðar fréttir, að í sumar stendur til að vígja Miðgarðakirkju eftir uppbyggingu. Viðgerðum miðar vel eftir brunann sem átti sér stað í september 2021. Hópurinn skoðaði kirkjuna, en einnig var nýr göngustígur skoðaður. Hann liggur meðfram vesturströnd eyjarinnar og var kláraður á síðasta ári. Með tilkomu stígsins eykst aðgengi að sögustöðum og fallegri strandlínu, segir ennfremur í fréttinni.

Fundur gestanna með heimafólki var haldinn í félagsheimilinu Múla, þar sem rætt var um margvísleg málefni, svo sem lausagöngu búfjárs, ástand gatna, húseignir bæjarins, mál er varða slökkviliðið auk umræðu um byggðakvóta og ferjumál.

Nokkrar myndir úr fréttinni á vef bæjarins