Málþing: Hættur gegn börnum í stafrænum heimi

Félagsmiðstöðvar Akureyrar og Akureyrarbær bjóða til málþings í Hofi kl 16.30 í dag, undir yfirskriftinni 'Vernd og viðbrögð - kynferðisafbrot barna og ungmanna í nútímasamfélagi'.  Í lýsingu á málþinginu segir: Í nútímasamfélagi eiga börn og ungmenni í sífellt meiri samskiptum í gegnum stafræna miðla – þar sem mörk geta orðið óskýr, hættur leynast og aðgengi gerenda að börnum er meira en nokkru sinni fyrr.

Öll eru velkomin á meðan húsrúm leyfir, málþingið gæti verið sérstaklega áhugavert fyrir foreldra, fagfólk, kennara, starfsfólk í tómstundastarfi og aðra sem umhugað er um velferð barna og ungmenna. Meðal þess sem skoðað verður er hvernig þessi brot birtast í dag, hver staða barna og ungmenna er í stafrænum samskiptum og hvaða hlutverki samfélagið gegnir í vernd og viðbrögðum.

Sérstök áhersla verður lögð á þá ógn sem stafrænn heimur getur skapað – þar á meðal tælingu (e.grooming) í gegnum samfélagsmiðla eins og Snapchat og TikTok, þar sem gerendur mynda tengsl við börn með það að markmiði að brjóta á þeim.

Erindi á málþinginu:

• Kolbrún Hrund Sigurgeirsdóttir, Barnaheill – Þegar kynferðisbrot eiga sér stað milli unglinga á grunnskólaaldri
• Skarphéðinn Aðalsteinsson, Lögreglan á Norðurlandi eystra – Tælingar og kynferðisafbrot
• Svandís Anna Sigurðardóttir, Stígamót – Sjúkást á Sjúktspjall: Sambönd, samskipti og ofbeldi ungmenna á nafnlausu netspjalli
• Skúli B. Geirdal, sviðsstjóri SAFT – Foreldrar og samfélagsmiðlar: Leiðarvísir um netheima

Fundastjóri er Hilda Jana Gísladóttir.

Í lok erindanna verður pallborðsumræða með fyrirlesurunum þar sem gestum gefst tækifæri til að spyrja og taka þátt í umræðunni.

Hér má skoða viðburðinn á Facebook.