Kiwanismenn gefa hjálma og reiðhjól

Kiwanisklúbbar um land allt gáfu í gær börnum, sem í vor ljúka 1. bekk grunnskóla, hlífðarhjálma eins og tíðkast hefur til áratuga. Þá færðu félagar í Kiwanisklúbbnum Kaldbak á Akureyri tveimur heppnum börnum glæsileg reiðhjól að gjöf.

Við Eyjafjörð fengu hátt í 300 börn hjálma frá Kaldbaksmönnum, á svæðinu frá Dalvík í vestri til Grenivíkur í austri. Úr þeim hópi voru svo dregin tvö nöfn og Írena Lind Marteinsdóttir og Guðlaugur Gísli Fannarsson voru boðuð að félagsheimili Kaldbaks á Akureyri þar sem reiðhjólin voru afhent.

Þetta er í 31. skipti sem Kaldbaksmenn gefa börnum hlífðarhjálma. „Við byrjuðum á þessu hér á Akureyri. Ég fékk hugmyndina 1991, fór í fyrirtæki og safnaði peningum. Það var svo 2005 sem hreyfingin kom inn í þetta á landsvísu,“ sagði Stefán Jónsson við Akureyri.net í gær, en hann er nú formaður hjálmanefndar Kaldbaks. Eimskip kom snemma að verkefninu með Kiwanismönnum að verkefninu.