Kettlingur á Raufarhöfn með fuglaflensu

Skæð fuglainflúensa af gerðinni H5N5 greindist kettlingi frá Raufarhöfn sem komið var með til dýralæknis á Akureyri í síðustu viku. Þetta er í fyrsta skipti sem fuglaflensa greinist í spendýri á Norðurlandi svo vitað sé.

„Um er að ræða um átta mánaða kettling sem varð skyndilega veikur, var orðinn mjög slappur á öðrum degi veikinda og fékk krampa á þriðja degi. Hann var aflífaður,“ segir í tilkynningu frá Matvælastofnun, MAST. Annar köttur er á sama heimili en hann er frískur. Þetta er þriðji kötturinn sem greinist með fuglainflúensu H5N5 hér á landi, sá fyrsti veiktist í byrjun desember. Alls hafa sýni verið tekin úr tólf köttum frá því í desember en níu þeirra voru neikvæðir.

• Rétt er að taka fram að engin tilfelli eru þekkt í heiminum af sýkingum í fólki vegna fuglainflúensuveiru af því afbrigði sem hefur verið að greinast hér á landi síðustu mánuði.

Kötturinn sem um ræðir hafði hafði verið veikur, m.a. með taugaeinkenni, og eigendur fóru með hann til dýralæknis á Akureyri sem tilkynnti um hann til Matvælastofnunar. Í gær bárust MAST upplýsingar frá Tilraunastöð HÍ að Keldum hvers kyns var.

Berst ekki milli spendýra

Engar vísbendingar eru um að þetta afbrigði af fuglainflúensu berist á milli spendýra og því er talið líklegast að þessi kettlingur hafi smitast af sýktum villtum fugli, þrátt fyrir að ekki hafi borist margar tilkynningar um veika eða dauða fugla í nágrenni Raufarhafnar, að því segir í tilkynningu MAST. „Aðeins hafa 15 sýni verið tekin úr fuglum á norðausturhorni landsins frá því í september á síðasta ári. Fuglainflúensa af gerðinni H5N5 greindist í sex þeirra, í einum fálka sem fannst nálægt Kópaskeri í september, í fjórum hettumáfum á Húsavík í sama mánuði og í einum silfurmáfi þar í nóvember.“

• Matvælastofnun hvetur dýraeigendur til að vera vakandi fyrir sjúkdómseinkennum í dýrum sínum sem geta bent til fuglaflensu
• Fólk er hvatt til að leita tafarlaust til dýralækna ef dýrin verða skyndilega mjög slöpp og fá taugaeinkenni.

Almenningur er líka áfram beðinn um að tilkynna til Matvælastofnunar um veika eða dauða villta fugla og villt spendýr. Það er gert með því að smella á hnappinn „Ábendingar og fyrirspurnir“ á heimasíðu stofnunarinnar (www.mast.is). „Mikilvægt er að lýsa nákvæmlega staðsetningu, helst með hnitum, og gott ef hægt er að senda mynd með,“ segir í tilkynningu á vef MAST.