KEA hagnaðist um 1,4 milljarða í fyrra

Fjárfestingafélagið KEA hagnaðist um 1.430 milljónir króna á síðasta ári. Þetta kom fram á aðalfundi félagsins í fyrrakvöld. Tilkynning um afkomuna og fleira í rekstrinum var birt á vef KEA í gær.

Í tilkynningunni segir:

• Hreinar fjárfestingatekjur voru 1.727 milljónir króna og hækkuðu um 670 milljónir króna á milli ára.
• Eigið fé var tæpir 11 milljarðar og heildareignir námu tæplega 11,2 milljarði króna.
• Eiginfjárhlutfall var rúmlega 98%.
• Í samræmi við stefnu félagsins var eignasafn þess einfaldað á árinu, eignir seldar og verkefnum fækkað.
• Verulega var aukið við vægi fasteignatengdra verkefna þegar dótturfélag KEA keypti 119 íbúðir á Akureyri af Íveru fyrir 5 milljarða.
• Kaup íbúðanna var fyrsta skrefið í því að byggja upp íbúðafélag sem leigir út íbúðir á almennum markaði.
• Auk þess var fjárfest í stóru fasteignaþróunarverkefni við Viðjulund á Akureyri.
• Á árinu voru seldir eignarhlutir í Slippnum Akureyri, Norðurböðum og Íslenskum verðbréfum.
• Aukið var við hlut félagsins í Ferro zink og á KEA nú allt hlutafé félagsins.
• Jafnframt var hlutur félagsins í Norlandair aukinn og er nú 45% og er KEA stærsti eigandi félagsins.
• Heilt yfir gekk félögum sem KEA á eignarhluti í vel í sínum rekstri. Áfram verður unnið í því að einfalda eignasafnið og fækka en um leið stækka þau verkefni sem félagið hefur með höndum.

Halldór Jóhannsson er framkvæmdastjóri KEA og stjórnarformaður Eiríkur Haukur Hauksson.