KA-maðurinn Mikael Breki æfir hjá Molde

Mikael Breki Þórðarson, knattspyrnumaður úr KA, æfir með norska liðinu Molde FK þessa dagana og er þar til reynslu. „Mikael er gríðarlega mikið efni en hann er fæddur árið 2007 og hefur komið við sögu í þremur leikjum KA á tímabilinu,“ segir á heimasíðu KA í morgun.

Mikael Breki varð yngsti leikmaður KA í efstu deild, aðeins 15 ára, þegar hann kom inná og lék síðustu mínúturnar gegn ÍBV í fyrrasumar.

Á vef KA segir að Mikael Breki hafi tekið þátt í fyrstu æfingunni með Molde í gær, en á sunnudaginn var hann áhorfandi á leik Molde og HamKam. Með HamKam leikur KA-maðurinn Brynjar Ingi Bjarnason. Mikael Breki mun æfa út vikuna með Molde FK „og vonandi vekja áhuga Norðmannana,“ segir á KA-síðunni.

Molde er sögufrægt félag sem fimm sinnum hefur orðið Noregsmeistari, síðast árið 2022. Molde hefur sex sinnum orðið norskur bikarmeistari, síðast í fyrra.