Hjartaþræðingar verði framkvæmdar á SAk

Logi Einarsson, þingmaður Samfylkingarinnar í Norðausturkjördæmi, vill að Sjúkrahúsinu á Akureyri (SAk) verði gert kleift að framkvæma hjartaþræðingar. Logi er fyrsti flutningsmaður þingsályktunartillögu þess efnis sem hann lagði fram á Alþingi í dag. Meðflutningsmenn eru úr öllum flokkum, þar á meðal allir þingmenn Norðausturkjördæmis.

„Það myndi auka jöfnuð og aðgengi að meðferðum við hjartasjúkdómum á Íslandi og styrkja heilbrigðisþjónustu á Norðurlandi en nauðsynlegt væri að tryggja samstarf við Landspítala og erlent hátæknisjúkrahús til að tryggja gæði meðferðar,“ segir Logi meðal annars í grein sem birtist á Akureyri.net í dag.

Logi nefnir einnig meðal annars:

• Aðstaða til hjartaþræðinga myndi auka getu SAk sem varasjúkrahúss á Íslandi
• Þörf fyrir sjúkraflug gæti minnkað talsvert, sem og kostnaður vegna ferða- og dvalarkostnaðar sjúklings og aðstandenda
• Íbúar á upptökusvæði SAk ættu að komast mun fyrr í hjartaþræðingu sem myndi auka batalíkur og lífsgæði til muna

Smellið hér til að sjá grein Loga Einarssson á Akureyri.net

Smellið hér til að sjá þingsályktunartillöguna á vef Alþingis