Hinsegin Norðurland á leið í Gleðigönguna

Gleðigangan, hápunktur Hinsegin daga, fer fram í miðbæ Reykjavíkur á morgun. Hinsegin Norðurland tekur að vanda þátt í göngunni með litríkan vagn.

„Við reiknum með því að það fari 12 manns frá okkur í ár, segir Einar Schiöth, gjaldkeri HiN á Norðurlandi, en Gleðigangan er í senn kröfuganga þar sem hinsegin fólk minnir á baráttumál sín sem og vettvangur til að fagna því sem áunnist hefur í baráttunni. Að sögn Einars hafa félagar í Hinsegin Norðurland tekið þátt í göngunni síðan 2012. „2014 var fyrsta skiptið sem við tókum þátt sem sjálfstætt félag, fyrir það vorum við partur af hóp ungliða S'78,“  segir Einar. 

Fjölbreytileiki þemað í ár

Einar segir að það hafi allur gangur verið á fjölda þeirra sem tekið hafa þátt í göngunni í gegnum árin frá Hin Norðurland en þó sé óhætt að segja að þátttakendum fari hægt og rólega fjölgandi. „Á hverju ári erum við með eitthvað þema, þemað í ár er fjölbreytileiki. Yfirleitt er haft lauslegt þema til þess að þátttakendur af okkar hendi fái meira frelsi hvað varðar búninga, málningu og þess háttar. Annars er rútínan okkar alltaf svipuð; mæta í búningum, skreyta vagninn með einhverju litríku, húllumhæ og skemmta sér," segir Einar. 

Gangan hefst kl. 14 og er gengið frá Hallgrímskirkju niður Skólavörðustíg og endað við gatnamót Fríkirkjuvegar og Skothúsvegar.