Gunnar Rúnar ráðinn slökkviliðsstjóri

Gunnar Rúnar Ólafsson hefur verið ráðinn slökkviliðsstjóri hjá Slökkviliði Akureyrar. Þetta var tilkynnt á vef Akureyrarbæjar í dag. Hann tekur við af Ólafi Stefánsson sem sagði starfi sínu lausu í vetur.

Gunnar er með MSc-gráðu í forystu og stjórnun með áherslu á verkefnastjórnun frá Háskólanum á Bifröst (2021), menntaður bráðatæknir frá University of Pittsburgh School of medicine (2006) og löggildur slökkviliðs- og sjúkraflutningamaður.

Gunnar hefur verið starfandi varaslökkviliðsstjóri hjá Slökkviliði Akureyrar frá árinu 2017. Gunnar starfaði sem öryggisstjóri Landvinnslu hjá Samherja á Íslandi árin 2012-2017, var öryggisstjóri hjá Kötlu Seafood 2011-2012, aðstoðarvarðstjóri hjá Slökkviliði Akureyrar 2010-2011, slökkvliðs/ sjúkraflutningamaður hjá Slökkviliði höfuðborgarsvæðisins 2003-2010 og slökkviliðs/sjúkraflutningamaður slökkviliði Akureyrar 1999-2003.