Gunnar og Elma ný í forystu L-listans

Gunnar Líndal Sigurðsson verður í efsta sæti L-listans við bæjarstjórnarkosningarnar í vor og Elma Eysteinsdóttir í öðru sæti. Hvorugt hefur tekið þátt í stjórnmálastarfi áður. Núverandi bæjarfulltrúar listans verða í næstu sætum, Halla Björk Reynisdóttir, forseti bæjarstjórnar, í þriðja sæti og Andri Teitsson í því fjórða.

Gunnar Líndal er forstöðumaður rekstrardeildar Sjúkrahússins á Akureyri. „Ég hef mikla reynslu af rekstri og stjórnun og mig langar að nýta hana til að byggja upp bæinn okkar og efla hér atvinnulíf, íþrótta- og tómstundastarf og samfélagið í heild sinni,“ sagði hann við Akureyri.net í dag, spurður hver væri ástæða þess að hann gæfi kost á sér.

Elma er ÍAK einkaþjálfari og húsmóðir : „Mig langar til að taka þátt í að efla Akureyri,“ segir hún. „Mér finnst ég hafa mikið fram að færa til að gera góðan bæ betri og ennþá skemmtilegri fyrir unga sem aldna.“

Listi fólksins bauð fyrst fram í bæjarstjórnarkosningum á Akureyri 1998 og hefur átt bæjarfulltrúa allar götur síðan. Listinn náði þeim sögulega árangri í kosningunum 2010 að fá sex menn kjörna og hreinan meirihluta; það hefur engu öðru framboði tekist, hvorki fyrr né síðar.

Nöfn annarra frambjóðenda en fjögurra efstu verða tilkynnt síðar.