Fylgið meira í NA en flokksins á landsvísu
Sjálfstæðisflokkurinn í Norðausturkjördæmi nýtur meira fylgis en flokkurinn á landsvísu skv. könnun Maskínu á fylgi stjórnmálaflokkanna sem kynnt var fyrir helgi. Það vekur athygli, svo og það að hvergi nema í Suðurkjördæmi nýtur flokkurinn meira fylgis; þar er fylgið langmest (17,5%) en næst koma Norðvestur- og Norðausturkjördæmi, þar sem fylgið er nánast það sama – 14,8 og 14,7%.
Bent var á það í Morgunblaðinu í dag að í liðnum mánuði hefði Sjálfstæðisflokkurinn fengið innan við 10% í Norðausturkjördæmi í könnun Maskínu og það hafi verið áberandi versta frammistaða flokksins eftir kjördæmum. Nú er útkoman sem sagt allt önnur.
Sjálfstæðismenn raða niður á lista flokksins í Norðausturkjördæmi fyrir Alþingiskosningarnar 30. nóvember á tvöföldu kjördæmisþingi sem fram fer í Mývatnssveit á morgun, sunnudag. Kosið verður í hvert og eitt efstu sætanna fimm en síðan kosið um tillögu kjörnefndar um 6. - 20. sæti.
Fylgi Sjálfstæðisflokksins er þetta skv. nýjustu könnun Maskínu:
- Sjálfstæðisflokkurinn á landsvísu 14,1%
- Reykjavík - Norður 11,0%
- Reykjavík - Suður 12,8%
- Suðvestur 13,8%
- Norðvestur 14,8%
- Norðaustur 14,7%
- Suður 17,5%
Í dag höfðu 11 tilkynnt um framboð í efstu sæti listans. Smellið hér til að sjá frétt Akureyri.net frá því í morgun.
