Færðu Súlum 750.000 krónur að gjöf

Björgunarsveitin Súlur á Akureyri fékk í gær 750.000 krónur að gjöf í minningu fjögurra ungra MA stúdenta sem fórust í flugslysi á Öxnadalsheiði 29. mars árið 1958.

Minnisvarði um fjórmenningana var afhjúpaður á heiðinni í sumar. Fjölskyldur og vinir þeirra settu á stofn minningarsjóð til að standa straum af kostnaði, mun meira safnaðist en til þurfti og því var ákveðið að afgangurinn rynni til björgunarsveitarinnar.

Þeir sem létust í slysinu voru Bragi Egilsson, Geir Geirsson, Jóhann Möller og Ragnar Friðrik Ragnars. Allir höfðu lokið stúdentsprófi frá Menntaskólanum á Akureyri árið áður, voru við nám í Háskóla Íslands en flugu norður þennan örlagaríka dag í fjögurra sæta flugvél; hugðust heimsækja góða vini og gamla skólann sinn þar sem halda átti skemmtun um kvöldið.

„Okkur, fjölskyldum ungu mannanna, er það mjög kært að geta lokið verkefninu með þessari gjöf,“ sagði Laufey Egilsdóttir, systir Braga heitins, þegar hún afhenti Halldóri Halldórssyni, formanni Súlna, gjöfina í gær í húsakynnum sveitarinnar.

Fyrri fréttir Akureyri.net:

• Reisa minnisvarða á Öxnadalsheiði
• Minnisvarði um vinina fjóra – MYNDIR