Börnin eru mikilvæg við lýðræðisborðið

Um 120 ungmenni á aldrinum 12-18 ára tóku þátt í Stórþingi ungmenna sem haldið var í Hofi á þriðjudaginn. Þetta er í þriðja sinn sem slík samkoma er haldin í því barnvæna sveitarfélagi sem Akureyri formlega er.

Ungmennin ræddu ýmis mál á þinginu, s.s. samgöngur, geðheilbrigði, tómstundir og skólamál. Sem dæmi um það sem oft var nefnt var að götu- og göngustígalýsing mætti víða vera betri og að skoða þurfi betur hjólastólaaðgengi í bænum.

Akureyrarbær er barnvænt sveitarfélag sem fyrr segir og í því felst meðal annars að leita markvisst eftir röddum unga fólksins. Stórþingið er einn liður í því en tilgangurinn er að veita börnum og ungmennum vettvang til að koma á framfæri skoðunum sínum og hugmyndum um þau atriði sem helst brenna á þeim og koma þeim skilaboðum áleiðis til bæjaryfirvalda. Ungmennaráð bæjarins ber hitann og þungann af þinginu en ráðið setti þingið eftir að hafa kynnt sína starfsemi og undirstrikað mikilvægi þess að ungmennin sem þarna væru samankomin myndu ekki liggja á skoðunum sínum.

„Stemningin var gríðarlega góð, áhugaverðar og gagnlegar umræður áttu sér stað og enn og aftur kemur það í ljós hve mikill auður er í börnum í sveitarfélaginu. Gott er að muna að þau eru ekki bara framtíðin heldur eru þau nútíðin og mikilvægt að bjóða þeim aðkomu að lýðræðisborðinu,“ segir í tilkynningu frá Akureyrarbæ.

„UNICEF á Íslandi hefur stutt dyggilega við verkefnið Barnvænt sveitarfélag á Akureyri síðustu árin og því var vel við hæfi að Hanna Borg Jónsdóttir, verkefnisstjóri barnvænna sveitarfélaga hjá UNICEF, kom á þingið og flutti þar erindi um Barnasáttmála Sameinuðu þjóðanna og mikilvægi merkingarbærrar þátttöku barna.“