Fréttir
Boðið upp á „trjágöngu“ um Akureyri í kvöld
11.07.2024 kl. 15:35
![](/static/news/lg/skjamynd-5826.png)
Skógræktarfélag Eyfirðinga býður upp á trjágöngu um Akureyri í kvöld, fimmtudaginn 11. júlí, kl. 19.00. Gengið er um bæinn og merk tré skoðuð.
„Gangan hefst og endar á Ráðhústorgi og felur í sér að rölta rólega um fallega bæinn okkar og skoða græn svæði og merk tré. Gangan ætti að taka um 60-90 mínútur og öll eru velkomin!“ segir í tilkynningu.
Ingólfur Jóhannsson framkvæmdastjóri Skógræktarfélagsins mun setja viðburðinn með stuttu opnunarávarpi, þá mun Jón Birgir Gunnlaugsson, verkefnastjóri umhverfismála hjá Akureyrarbæ, segja nokkur orð áður en Bergsveinn Þórsson, starfsmaður Skógræktarfélagsins, leiðir fólk af stað í trjágönguna.
Að göngu lokinni mun Skógræktarfélagið bjóða upp á brakandi heitt ketilkaffi og djús, að því er segir í tilkynningunni, og þátttakendur geta notið og spjallað.