Akureyri mynduð fyrir Apple Maps

Akureyri verður mynduð í bak og fyrir í dag og ef til vill næstu daga. Þessa dagana eru bílar á vegum Apple á landinu með háþróaðar myndavélar á þakinu, aka um allar götur og taka myndir fyrir svokallaða götusýn eiginleikann í Apple Maps, Look Around.

Fram hefur komið í fjölmiðlum undanfarna daga að sex bílar hafi komið með Norrænu til landsins og áætlað að þeir verði á ferðinni um landið til 7. september. Þá munu einnig vera á ferðinni bílar frá Google Maps við uppfærslu á götusýn fyrirtækisins, samkvæmt frétt DV. Google Maps og Já.is mynduðu fyrst hér á landi árið 2013, en þetta er í fyrsta skipti sem myndað er fyrir Apple.