Akureyrarbær auglýsir Sigurhæðir til leigu

Stjórn Akureyrarstofu hefur ákveðið að Sigurhæðir, hús séra Matthíasar Jochumssonar, verði auglýst til leigu.

Umsókn eiga að fylgja upplýsingar um hugmyndir að notkun og rekstri hússins; m.a. um hvaða starfsemi fólk hafi í huga, hvernig hún tengist sögu hússins, hvernig hún verði fjármögnuð og hvernig rekstur muni standa undir húsaleigu og föstum rekstrarkostnaði hússins. Ekki er gert ráð fyrir að búið verði í húsinu.

Á síðasta ári átti að semja við Hlyn Hallsson og Kristínu Kjartansdóttur um leigu á húsinu. Þau gerðu ráð fyrir að búið yrði að staðaldri á efri hæð Sigurhæða og óskuðu eftir að breytingar yrðu gerðar á húsinu með það í huga. Þegar í ljós kom að ráðast þyrfti í viðamiklar og dýrar viðgerðir var ákveðið að hætta við útleigu.

Fyrir nokkrum misserum ákvað Akureyrarstofa að Sigurhæðir yrðu seldar en eftir mikla gagnrýni bæjarbúa var fallið frá þeirri hugmynd. Í húsinu hefur árum saman verið minningarsafn um séra Matthías.