Ungur Þór og gamall Þór í leikmannahópinn!

Handknattleiksdeild Þórs hefur samið við tvo leikmenn, báða með millinafnið Þór! Þetta eru Sævar Þór Stefánsson og Heiðar Þór Aðalsteinsson, sem bætast í leikmannahópinn fyrir leikinn við Fjölni í undanúrslitum Grill 66 deildar Íslandsmótsins í kvöld. Greint er frá þessu á heimasíðu Þórs.

Leikur Fjölnis og Þórs fer fram í Dalhúsum í Grafarvogi í dag og hefst kl. 18.00. Það er fyrsti leikur liðanna í undanúrslitum Grill 66 deildarinnar, en sigurliðið í einvíginu mætir annaðhvort Víkingi eða Kórdrengjum í úrslitaeinvígi um laust sæti í efstu deild Íslandsmótsins, Olísdeildinni, á næsta tímabili.

Annar leikur liðanna verður í Íþróttahöllinni á Akureyri mánudaginn 17. apríl kl. 18. Vinna þarf tvo leiki til að fara áfram í úrslitaeinvígið. Ef  kemur til oddaleiks verður hann í Dalhúsum sumardaginn fyrsta, fimmtudaginn 20. apríl kl. 18.

• Sævar Þór Stefánsson er efnilegur línumaður fæddur 2006 og hefur verið einn af burðarásum síns árgangs frá því að hann byrjaði að æfa handbolta. Sævar Þór hefur verið í æfingahópum U15 og U16 ára landsliðum Íslands, síðast í mars fyrir ári síðan. Sævar Þór er einn af fjölmörgum ungum og spennandi leikmönnum okkar Þórsara og með fyrstu skrefum deildarinnar í þeirri vegferð að byggja upp þéttan og góðan kjarna af ungum leikmönnum.
• Heiðar Þór Aðalsteinsson hornamaður ákvað að taka skóna af hillunni og skrifaði í gær undir leikmannasamning við handknattleiksdeildina og mun hjálpa liðinu í gegnum úrslitakeppnina þar sem margir af leikmönnum liðsins eru tæpir og jafnvel meiddir. Heiðar er öllum hnútum kunnugur hjá Þór enda uppalinn í Þorpinu. Hann spilaði síðast með Val en þar á undan Akureyri handboltafélagi.