Topplið Fram sækir Þórsara heim í dag

Þór tekur á móti Fram í næst efstu deild Íslandsmótsins í knattspyrnu, Lengjudeildinni, á Þórsvellinum (Salt Pay vellinum) í dag. Leikurinn hefst klukkan 18.00.

Framarar eru langestir í deildinni með 32 stig eftir 12 leiki og ÍBV er næst með 26 stig að loknum 13 leikjum. Þórsarar eru sem stendur í sjötta sæti með 19 stig eftir 13 leiki.

Framarar hafa unnið 10 leiki í sumar og gert tvö jafntefli. Þórsarar hafa unnið fimm, gert fjögur jafntefli og tapað fjórum. Lið Þórs hefur verið á góðu skriði undanfarið og er taplaust í síðustu sex leikjum, hefur unnið þrjá og gert þrjú jafntefli. Því verður fróðlegt að fylgjast með rimmu liðanna í kvöld.

Þegar liðin mættust í fyrri umferðinni á Framvellinum sigraði Reykjavíkurliðið 4:1, þar sem Bjarni Guðjón Brynjólfsson skoraði fyrir Þór undir lokin – það var fyrsta mark hans fyrir Þór, en nú hefur þessi bráðefnilegi 17 ára piltur gert þrjú mörk í deildinni.

Í síðustu umferð unnu Þórsarar öruggan sigur á Gróttu á heimavelli, 4:2, en Framarar gerðu jafntefli við ÍBV á heimavelli, 1:1.

Á heimasíðu Þórs er bent á að vegna hertra sóttvarnarreglna verði engin upphitun fyrir stuðningsmenn í Hamri fyrir leik. „Hvað miðasölu varðar þá verða 600 miðar í boði í þremur sóttvarnarhólfum. Miðar eru seldir við hlið sem og í gegnum miðasöluappið stubbur.app. Allir miðar skráðir á nafn, kennitölu og símanúmer. Þá bendum við á að nú er grímuskylda í stúkunni,“ segir á heimasíðunni.