Þrjú mörk og þrjú stig í sarpinn – MYNDIR
Þórsarar unnu annan leikinn í röð í Lengjudeildinni í knattspyrnu, næst efstu deild Íslandsmótsins, þegar KV kom í heimsókn í gær. Leikurinn fór 3:1 og Þórsliðið hefur þar með gert átta mörk í tveimur leikjum.
_ _ _
FYRSTA MARK LEIKSINS
Óhætt er að segja að Alexander Már Þorláksson hafi byrjað vel með Þór. Hann kom frá Fram á dögunum og hefur nú gert þrjú mörk í fyrstu tveimur leikjunum. Alexander náði forystunni í gær á 47. mín. eftir mjög góða sendingu Nikola Kristins Stojanovic inn fyrir vörnina; markaskorarinn kom boltanum framhjá Ómari Castaldo Einarssyni markverði með fyrstu snertingu og eftirleikurinn var auðveldur.
_ _ _
ALEXANDER SKORAR AFTUR
Þór komst í 2:0 á 54. mínútu. Harley Willard sendi boltann hárnákvæmt á milli miðvarða KV, Alexander Már stakk þá af og skoraði framhjá Ómari markverði.
_ _ _
WILLARD GERIR ÞRIÐJA MARKIÐ
Harley Willard gerði þriðja mark Þórs á 75. mínútu. Þórsarar náðu boltanum á miðju vallarins og Aron Ingi Magnússon tók á sprett í átt að vítateig KV. Þegar varnarmaður sótti að Aroni sendi hann boltann til hægri á Willard, sem skoraði með hnitmiðuðu skoti neðst í fjærhornið.
_ _ _
KV MINNKAR MUNINN
Björn Axel Guðjónsson skoraði fyrir KV á 88. mínútu eftir hornspyrnu. Boltinn var skallaður niður til Björns þar sem hann var óvaldaður í grennd við fjærstöngina og átti auðvelt með að koma KV á blað.
