Þór - Víkingur og KA - Grindavík í bikarnum
Þórsarar fá bikarmeistara Víkings í heimsókn í átta liða úrslitum bikarkeppni karla í fótbolta, Mjólkurbikarkeppninni, og KA-menn taka á móti Grindvíkingum. Helmingur leikja átta liða úrslitanna fer því fram á Akureyri.
Dregið var í átta liða úrslitum í hádeginu. Nafn Þórs var dregið fyrst og síðan komu bikarmeistararnir úr pottinum. Víkingar hafa unnið bikarkeppnina þrisvar í röð. KA kom næst síðast upp úr pottinum og þá var ljóst hver mótherjinn yrði; nafn Grindavíkur var það eina sem eftir var.
Þór vann Leikni 3:1 í 16-liða úrslitunum á heimavelli og KA lagði HK 3:1 í Kópavogi. Víkingar sigruðu Gróttu 2:1 í gærkvöldi og þá gerðu Grindvíkingar sér litið fyrir og unnu Valsmenn í Reykjavík, 3:1. Grindavík og Þór eru einu liðinu úr næst efstu deild Íslandsmótsins sem eftir eru í bikarkeppninni, hin sex leika í Bestu deildinni.
Drátturinn í heild er sem hér segir:
- Þór - Víkingur R.
- KR - Stjarnan
- Breiðablik - FH
- KA - Grindavík
