Þór sigraði Þrótt í miklum markaleik
Þórsarar unnu Þrótt 4:3 í gær þegar liðin mættust í Egilshöll í Lengjubikarkeppninni í knattspyrnu. Þetta var síðasti leikur 4. riðils A-deildar og Þórsarar ljúka keppni með sex stig úr fimm leikjum.
Leikurinn hófst með látum því Alexander Már Þorláksson kom Þór yfir strax á þriðju mínútu, Guðmundur Axel Hilmarsson jafnaði á 15. mín., Alexander skoraði aftur á 18. mín. og Guðmundru jafnaði á ný á 28. mín.
Þróttur tók forystu strax í upphafi síðari hálfleiks en Ýmir Már Geirsson jafnaði fyrir Þór á 80. mín., fimm mín. eftir að hann kom inn á í fyrsta leiknum með Þór. Það var svo Nikola Kristinn Stojanovic, sem kom inn á um leið og Ýmir, sem gerði sigurmarkið á 82. mín. Þetta var fyrsti leikur Nikola í mótinu en hann meiddist mjög alvarlega í fyrrasumar.
