Lengjudeildin: 6:0 tap Þórs gegn Fjölni

Þórsarar fengu 6:0 skell gegn Fjölni í Lengjudeild karla nú í kvöld. Þrjú mörk í hvorum hálfleik frá Fjölnismönnum og sex marka tap niðurstaðan. Vægast sagt slæm úrslit.

Máni Austmann Hilmarsson gerði fyrsta mark Fjölnis á 20. mínútu með góðu skoti utan teigs. Þórsarar urðu svo fyrir áfalli stuttu eftir markið þegar Marc Sörensen fór meiddur af velli. Á 39. mínútu leiksins gerði Axel Freyr Harðarson annað mark Fjölnis og á 44. mínútu gerði Hákon Ingi Jónsson þriðja mark heimamanna úr Grafarvogi. Þannig var staðan í hálfleik og útlitið dökkt fyrir Þórsliðið.

Seinni hálfleikur var ekki betri fyrir gestina. Á 61. mínútu gerði Máni Austmann annað mark sitt og fjórða mark Fjölnis. Axel Freyr gerði svo fimmta markið á 72. mínútu leiksins og aðeins tveimur mínútum síðar var Hákon Ingi búinn að gera sjötta mark Fjölnis. Ekki voru fleiri mörk skoruð og lokatölur 6:0!

Eins og augljóst er af lokatölum leiksins var spilamennska Þórsliðsins ekki góð. Fjölnismenn voru betri aðilinn allan tímann og fengu í lokin færi til að bæta við frekar en að Þórsliðið gerði sig líklegt til að minnka muninn. Eftir leikinn er liðið í fjórða sæti deildarinnar með sex stig og eins og markatala liðsins orðin slæm en liðið er nú með -5 í markatölu. Einhverjum leikjum er ólokið í umferðinni svo staða liðsins gæti breyst. Næsti leikur liðsins er heimaleikur gegn Ægi eftir viku

Smelltu HÉR til að sjá leikskýrsluna úr leiknum