Keiludeild Þórs: Lengi getur vont versnað

Óvissa er um fyrstu heimaleiki Þórsliðanna í 1. og 3. deild Íslandsmótsins í keilu eftir að Íþróttahúsinu við Vesturgötu á Akranesi var lokað í liðinni viku vegna viðhalds og endurbóta. Þetta kemur fram á heimasíðu Þórs.

Versta aðstaða á landinu?

„Keiludeild Þórs og keppendur á hennar vegum eru mögulega sá íþróttahópur sem býr við verstu aðstöðu allra íþróttaliða á landinu. Keilusalnum á Akureyri var lokað árið 2017 og keilufólk innan Þórs hefur því ekki getað stundað íþróttina á heimaslóðum í sex ár,“ segir á vef félagsins.

„Þau allra hörðustu létu það ekki stöðva sig heldur leituðu til Skagamanna, en næsti keilusalur við Akureyri er á Akranesi. Þar tóku heimamenn keilufólki frá Þór opnum örmum og hafa Þórsarar farið reglulega á Skagann til æfinga og fengið að spila sína heimaleiki undanfarin ár.“

Þór teflir fram tveimur karlaliðum í Íslandsmótinu í liðakeppni, einu í 1. deild og einu í 3. deild. Þór á nefnilega lið í efstu deild í keilu þrátt fyrir þennan skort á aðstöðu, eina karlalið Þórs í efstu deild karla í liðaíþrótt.

• Þór (1. deild) - Björgvin Helgi Valdimarsson, Ólafur Þór Hjaltalín, Birkir Örn Erlingsson, Steindór Máni Björnsson og Rúnar Ingi Grétarsson.
• Þór-Víkingur (3. deild) - Höskuldur Stefánsson, Njáll Harðarson, Þorgeir Jónsson og Guðmundur Konráðsson. 

Áfall á Akranesi

Hafi staðan ekki verið nógu slæm þá versnaði hún til muna í liðinni viku þegar Akraneskaupstaður tilkynnti um lokun íþróttahússins við Vesturgötu vegna ófullnægjandi loftgæða. Það þýðir að Þórsarar hafa misst heimavöllinn sinn og þurfa mögulega að leita annað til að spila heimaleiki sína í 1. deild karla.

Að sögn Björgvins Helga Valdimarssonar, formanns keiludeildarinnar, er enn sem komið er óvissa um heimaleiki Þórsliðanna vegna þessarar lokunar á Skaganum.

Nánar hér á heimasíðu Þórs