KEA vill reisa 9 hæða skrifstofubyggingu

Fjárfestingafélagið Klappir, dótturfélag KEA, er með í bígerð að reisa níu hæða skrifstofubyggingu á baklóð Glerárgötu 36. KEA er eigandi Glerárgötu 36 og skrifstofur félagsins eru í húsinu.

Verkefnið sjálft er í höndum Skálabrúnar, sem einnig er dótturfélag KEA, og var kynnt fyrir skipulagsráði í lok ágúst, en ekki var um eiginlega umsókn að ræða og engin afgreiðsla því farið fram í ráðinu. Markmiðið með kynningunni er að fá fram afstöðu skipulagsráðs áður en lengra er haldið.

Hugmyndin er að byggja allt að níu hæða skrifstofubyggingu á baklóð Glerárgötu 36 þar sem hver hæð væri 250-350 fermbetrar. Fram kemur í kynningu Skálabrúnar að skortur sé á frambærilegu skrifstofuhúsnæði með góðu aðgengi að nægum bílastæðum utan miðbæjarins og sögð mikil ásókn fyrirtækja og stofnana í húsið við Glerárgötu 36. Byggingin myndi til dæmis henta fyrirtækjum sem vilja færa sig til innanbæjar, eða fyrirtækjum og stofnunum sem vilja stækka eða koma sér fyrir á betri stað. Skálabrún vill skoða að nýta lóðina betur og byggja meira á henni. 

Hér má sjá skjáskot úr kynningu Klappa og ljósmyndir sem teknar voru í gær frá svipuðu sjónarhorni.

Stórt bílastæði, um 900 fermetrar með 40 stæðum, er á austurenda lóðarinnar eins og hún er í dag. Lóðin er um 2.250 fermetrar að stærð og byggingar á um 1.650 fermetrum. Hugmynd varðandi bílastæðamál gengur meðal annars út á að byggja húsið á súlum ofan á núverandi bílastæði og að byggja bílakjallara undir. Varðandi útlitið er talað um hlutlausa byggingu í umhverfinu, sambærilegt útlit og Höfðatorg í Reykjavík og Deloitte-byggingin við Smáratorg í Kópavogi.