Skipulagsdeildin með opið hús á morgun
Skipulagsdeild Akureyrarbæjar býður bæjarbúum að kynna sér tvær skipulagstillögur sem liggja frammi til kynningar á opnu húsi á morgun, fimmtudag, kl. 15-18 í Ráðhúsi Akureyrar. Starfsfólk þjónustu- og skipulagssviðs verður til aðstoðar og veitir upplýsingar. Mögulegt verður að koma á framfæri athugasemdum og ábendingum á staðnum.
Akureyri.net hefur fjallað um báðar þessar skipulagstillögur, en önnur þeirra er um breytingu á aðalskipulagi og deiliskipulagi fyrir Gleráreyrar 2-10 vegna áforma um að byggja þar fimm íbúðablokkir. Tillögurnar gera ráð fyrir að svæði VÞ6 í skipulagi og nyrsti hluti ÍB4 verði sameinuð og svæðið endurskilgreint sem miðsvæði, Gleráreyrum 10 bætt við og leyfilegt heildarmagn íbuða hækkað í 100-150 íbúðir.
Hugmynd að útliti Gleráreyra 2-10.
Hin tillagan tekur til stækkunar íbúðabyggðar að Naustum III, lóð minjasafns, vegna áforma um að útbúa þar sjö einbýlishúsalóðir, tvær parhúsalóðir og fimm raðhúsallóðir á svæði sem í dag er skipulagt sem svæði fyrir Minjasafnið. Akureyri.net hefur einnig fjallað um þessi áform - sjá hér.
Drög að skipulagi á reit Nausta III.
