Mikilvægt að þyrla geti lent við sjúkrahús

Stjórn Félags sjúkrahúslækna vill að endurskoðuð verði áform um að aðgengi þyrlu verði mögulega skert við Landspítalann í Reykjavík og Sjúkrahúsið á Akureyri.

Þyrlupallur er nú sunnan við Sjúkrahúsið á Akureyri en eftir að nýbygging rís þar fyrir legudeildir verður enginn lendingarstaður við stofnunina, eftir því sem Akureyri.net kemst næst, heldur er gert ráð fyrir að lent verði á Akureyrarflugvelli og sjúklingum ekið þaðan á sjúkrahúsið.

Stjórn Félags sjúkrahúslækna sendi í dag frá eftirfarandi ályktun, um þyrluaðgengi við heilbrigðisstofnanir á Íslandi:

Stjórn Félags sjúkrahúslækna ítrekar mikilvægi þyrluaðgengis við helstu heilbrigðisstofnanir á Íslandi til að flýta fyrir og tryggja aðgengi bráðveikra og slasaðra að nauðsynlegri heilbrigðisþjónustu.

Í greinargerð með ályktuninni segir:

Í umræðum síðustu misseri, hefur komið í ljós að í nýjum áformum um uppbyggingu stærstu sjúkrahúsa á Íslandi, nýjum Landspítala og Sjúkrahúsið á Akureyri, verði aðgengi þyrlu að sjúkrahúsunum mögulega skert. Stjórn Félags sjúkrahúslækna, óskar eftir að þau áform verði endurskoðuð, svo tryggt sé að bráðveikir og slasaðir njóti áfram sömu þjónustu og verið hefur síðustu áratugi. Heilbrigðisþjónusta er síbreytileg, gera þarf ráð fyrir þyrluaðgengi við heilbrigðisstofnanir landsins í framtíðinni.