Sumarlokanir leikskóla valda vandræðum á SAk
Fræðslu- og lýðheilsuráð hefur hafnað erindi Erlu Björnsdóttur, framkvæmdastjóra mannauðssviðs Sjúkrahússins á Akureyri, þess efnis að sumarlokun leikskóla Akureyrarbæjar verði endurskoðuð.
Í erindi til Akureyrarbæjar bendir Erla á að lokun leikskóla í júlí hafi valdið töluverðum vandræðum á Sjúkrahúsinu á Akureyri „þar sem þeir foreldrar er eiga börn á leikskóla óska eðlilega eftir sumarorlofi á þeim tíma sem leikskólar eru lokaðir. Við það skapast erfiðleikar í mönnun á sjúkrahúsinu því erfitt er að mæta orlofsóskum og þörfum svo margra á sama tíma,“ segir í erindi Erlu til bæjarins. Hún segir sumarafleysingafólk einnig koma fram með söum óskir enda eigi margt af því starfsfólki einnig börn á leikskólum. Erla bendir á að SAk þurfi að nýta allt sumarleyfistímabilið, frá 15. maí til 15. september í starfsemi sjúkrahússins og hentugast væri að sumarlokun leikskóla dreifðist á lengra tímabil, til dæmis frá 15. júní til 15. ágúst.
Þarna fara hagsmunir greinilega ekki saman því ráðið getur ekki orðið við beiðninni og bendir á að minnsta nýting sé á leikskólaplássum í júlí og hagkvæmast sé fyrir rekstur og þjónustu leikskólanna að loka í kringum þann tíma.
Samkvæmt fylgiskjali með afgreiðslu ráðsins er sumarlokun á leikskólum Akureyrarbæjar á þessu ári eru 1.-26. júlí á Iðavelli, Hólmasól, Tröllaborgum/Árholti, Krógabóli og Kiðagili, og 8. júlí til 2. ágúst á Naustatjörn, Hulduheimum, Klöppum og Lundarseli/Pálmholti. Í skjalinu má einnig finna dagsetningar sumarlokunar á leikskólum bæjarins næstu árin, til og með 2028.
